Elon Musk, Jeff Bezos dhe miliarderët e tjerë të botës kanë humbur 1.4 trilionë dollarë në gjysmën e parë të këtij viti, që ka rezultuar kështu më i keqi për ta pas ngritjes së madhe gjatë pandemisë. Në kushtet kur e gjithë bota është kapluar nga kriza për shkak të luftës në Ukrainë, politikëbërësit po rrisin normat e interesit për të luftuar kështu inflacionin e shtuar. Dhe ata që e pësojnë janë supermiliarderët, për shkak se aksionet e tyre humbasin vlerë shpejt. Kështu, pasuria e Elon Musk ra pothuajse me 62 miliardë dollarë. Jeff Bezos pa që pasuria e tij të tkurrej me rreth 63 miliardë dollarë. Pasuria neto e Mark Zuckerberg u ul me më shumë se gjysmën. Së bashku, 500 njerëzit më të pasur në botë humbën 1.4 trilion dollarë në gjysmën e parë të vitit 2022, një rënie marramendëse që shënon edhe rënien më të madhe gjashtëmujore ndonjëherë për klasën globale të miliarderëve. Ka pra një kthesë radikale krahasuar me dy vitet e kaluara, kur pasuria e ultra të pasurve u rrit shpejt ndërkohë që qeveritë dhe bankat qendrore morën masa të paprecedentta stimuluese në kuadër të pandemisë së koronavirusit, duke bërë që të rritej vlera e gjithckaje, që nga kompanitë e teknologjisë e deri tek kriptovalutat.