Dimri po vjen, forcat ruse po çajnë përpara, dhe e ardhmja e mbështetjes nga përkrahësi më i fuqishëm i Kievit është e pasigurt, sepse shba është pranë zgjedhjeve presidenciale, dhe gara është shumë e nxehtë. Ukraina po lufton për mbijetese dhe sovranitet, prandaj çdo ditë është mbase vendimtare për fatin e vendit. Por, një mori faktorësh e bëjnë këtë moment shumë delikat: Ukraina po përballet me trysni në shumë fronte, për më tepër në vijën e vërtetë të frontit të luftës, që shtrihet përgjatë vendit, nga verilindja deri në jug. Trupat ruse janë duke avancuar në rajonin lindor. E në prag të dimrit, bombardime të pareshtura ruse kanë kufizuar dukshëm prodhimin e energjisë, duke ngjallur frikë për një krizë të mundshme. Këtë javë, madje edhe moti në pjesën tjetër të botës duket se doli kundër Kievit: presidenti amerikan, Joe Biden, e anuloi një vizitë në Gjermani, pasi një uragan goditi Floridën, duke cuar në anulimin e një takimi të nivelit të lartë të shteteve të mëdha perëndimore, që furnizojnë Kievin me armë, me presidentin ukrainas Volodymyr Zelensky. Nuk është caktuar ndonjë datë e re për takimin e Grupit të Kontaktit për Mbrojtjen e Ukrainës, i cili do të ishte i pari në nivelin e krerëve të shteteve. Me gjasë, ky do të ishte takimi i fundit ballë për ballë mes Bidenit dhe Zelenskyt para zgjedhjeve në SHBA më 5 nëntor, rezultati i të cilave mund të ketë ndikim të madh në rrjedhën e luftës. Takimi do të ishte një mundësi për Zelenskin t'u paraqiste shteteve perëndimore "planin e tij të fitores" për luftën.