Kjo e mërkurë, 21 qershor, ëhstë dita më e gjatë e vitit, ose sic njihet ndryshe solstici i verës.Ky i fundit, është një event astronomik që shënon ditën më të gjatë të vitit dhe fillimin e verës në hemisferën veriore. Ai thuajse gjithnjë nis më 21 qershor por mund të qëllojë edhe në datat 20 ose 22 qershor, në varësi të vitit dhe zonës kohore ku ndodhesh. Në këtë ditë, rreth 90 për qind e popullatës së botës, që jeton mbi ekuator, në hemisferën veriore, do të shijojnë periudhën më të gjatë me dritë dielli në vit dhe po ashtu edhe natën më të shkurtër. Solstici i verës ndodh kur dielli është në pozicionin e tij më të lartë në qiell. Kjo ndodh një herë në vit për shkak se aksi i tokës është i pjerrët me rreth 23.5 gradë krahasuar me planin e orbitës së saj rreth diellit. Kjo pjerrtësi po ashtu shkakton edhe ndryshimin e stinëve. Për disa ditë apo javë, para dhe pas 21 qershorit, ata që jetojnë në Arktik, përfshirë pjesë të Alaskës, Kanadasë, Groenlandës dhe skandinavisë, kanë dritë dielli të vazhdueshme, cka rezulton në atë që njihet si dielli i mesnatës. Solstici i verës shënon po ashtu edhe ditën e parë të verës në kuptimin astronomik për ata që jetojnë në hemisferën veriore. Astronomët i përdorin datat e dy solsticeve dhe dy ekuinokseve për të shënuar stinët. Një ekuinoks ndodh kur dielli kalon mbi ekuator dhe pozicionohet saktësisht mes hemisferave veriore dhe jugore. Por, 21 qershori është në anën tjetër dita më e shkurtër e vitit në hemisferën jugore duke prekur 10 për qind të popullatës së botës. Për ata që jetojnë në vende si Argjentina, Australia, Afrika e jugut dhe Zelanda e Re, 21 qershori shënon ditën e parë të dimrit. Solstici i verës ndërkohë festohet në shumë kultura. Përgjatë histyorisë, kultura të ndryshme janë mbështetur në eventet qiellore për të përcaktuar praktikat e tyre bujqësore si koha e mbjelljes apo korrjes, etj.