Mëngjesin e 11 shtatorit 2001, amerikanët po nisnin atë që duhej të ishte një ditë normale e jetës së tyre, kur një avion i rrëmbyer u përplas me njërën kullë të Qendrës Botërore të Tregtisë. Ishte ora 08:46 minuta. 17 minuta më vonë, një avion tjetër, po ashtu i rrëmbyer, u përplas me kullën e dytë. Dy ndërtesat 110-katëshe, qiellgërvishtëset më të larta në Nju Jork, u përfshinë nga flakët, ndërsa qindra punonjës të emergjencave nxituan drejt kullave për të ndihmuar njerëzit e bllokuar brenda. Presidenti i atëhershëm, George Ë. Bush, ishte duke vizituar një shkollë në Florida kur ndodhën sulmet. Duke folur nga atje, ai tha se ngjarja në Nju Jork ishte “një sulm terrorist kundër Amerikës”. Vetëm pak minuta pas deklaratës së tij, në orën 09:37, avioni i tretë i rrëmbyer u përplas mbi njërën anë të ndërtesës së Pentagonit, selisë së mbrojtjes amerikane, pranë Uashingtonit.