Palestinezët në Bregun Perëndimor dhe Jeruzalemin Lindor, u mobilizuan të martën në protesta dhe greva të përgjithshme që paralizuan bizneset jo-jetike, në shenjë solidariteti me banorët e Gazas. Lëvizja Fatah e Presidentit palestinez Mahmud Abaz, kishte bërë thirrje për një “ditë zemërate”, thirrje kjo që bëri jehonë në qytetet me shumicë arabe dhe mikse të Izraelit. “Ne jemi këtu për të ngritur zërin dhe për të mbështetur popullin e Gazas që po bombardohet përditë.” – tha një protestues në Ramallah. Ushtria izraelite tha se trupat e saj u sulmuan në Ramallah, dhe dy ushtarë u dërguan në spital me plagosje në këmbë. Në një incident tjetër, një 25-vjecar palestinez u vra nga trupat izraelite në veri të Ramallahut. Sipas Ministrisë së Shëndetësisë të Palestinës, 70 persona u dërguan në spital pas përplasjeve me forcat izraelite, ku 5 prej tyre janë në gjendje të rëndë. Një tjetër person që sulmoi ushtarët izraelitë, u vra më herët gjatë ditës në Hebron. Izraeli është përpjekur t’i verë fre dhunës ndërmjet hebrejve dhe arabëve në vend, si dhe trazirave në Bregun Perëndimor që mbahet i pushtuar prej tij, ku autoritetet palestineze thonë se forcat izraelite kanë vrarë 22 njerëz që prej 10 majit. Pamjet: AFP