Nxitimi i pashpjegueshëm i qeverisë për të kaluar në Kuvend projektin e Portit të Durrësit, solli reagimin e fortë të opozitës. Enkelejd Alibeaj, në emër të grupit parlamentar të Partisë Demokratike, iu drejtua me një letër zyrtare kryeparlamentares, Lindita Nikolla ku kërkon kohë të pakufizuar për të diskutuar marrëveshjen e Portit të Durrësit. Në letër thuhet se projektligji në fjalë është i një rëndësie të veçantë, pasi ka të bëjë me tjetërsimin e një pasurie publike me interes kombëtar, strategjik dhe ekonomik. Për më tepër, që projektligji dhe aktet shoqëruese janë komplekse dhe meritojnë një debat parlamentar përmbajtësor. Miratimi i këtij projektligji me procedurë të përshpejtuar dhe shtuar këtu edhe shqyrtimi në seancë plenare me kohë të kufizuar, cilësohen nga Alibeaj si një tregues i qartë i vullnetit të qeverisë për të miratuar këtë marrëveshje me shpejtësi dhe pa një debat të thelluar parlamentar.