Një mbështetës miliarder i Donald Trump i ka kërkuar presidentit amerikan të ndalojë tarifat e tij tregtare të shpallura së fundmi sepse me to po rrezikon "një dimër bërthamor ekonomik të vetë-shkaktuar". Mes trazirave të tregjeve, miliarderi Bill Ackman tha se presidentit do t'i duhen tre muaj për të lejuar vendet të rinegociojnë marrëdhëniet e tyre tregtare me SHBA-në. Në postimin e tij në X të dielën, Ackman pranoi argumentin e Trumpit se sistemi i tregtisë globale kishte "ndëshkuar" SHBA-në. Por, shkroi ai, tarifat që Trump ka vendosur janë "masive dhe joproporcionale" dhe nuk bëjnë dallim mes miqve dhe armiqve të amerikës. Ackman, themeluesi miliarder i kompanisë së menaxhimit të fondeve të besimit Pershing Square, u bë një mbështetës i profilit të lartë i Donald Trumpit, në korrik 2024. Ai kishte mbështetur më parë Partinë Demokratike dhe ndërhyrja e tij u pa si një mbështetje e rëndësishme elektorale nga bota e biznesit. Të hënën, paralajmërimi i Ackman u përforcua nga një figurë tjetër e shquar e Ëall Street-it, kryetari i JPMorgan Chase, Jamie Dimon, sipas të cilit tarifat e Trumpit rrezikojnë të rrisnin çmimet për amerikanët. Në një letër drejtuar aksionerëve, Dimon tha se tarifat "ka gjasa të rrisin inflacionin dhe po bëjnë që shumë njerëz të konsiderojnë një mundësi më të madhe të një recesioni". "Sa më shpejt të zgjidhet kjo çështje, aq më mirë është sepse disa nga efektet negative rriten në mënyrë kumulative me kalimin e kohës dhe do të jetë e vështirë të zbrapsen" shkroi ai.