Avionët rusë që fluturojnë pranë kufijve të NATO-s për të frikësuar aleancën kanë shtuar frikën se mund të shkaktojnë një incident të mundshëm me pasoja të rënda. Komanda e Mbrojtjes së Hapësirës Ajrore të Amerikës së Veriut (NORAD) publikoi të hënën pamje që tregonin një avion rus Sukhoi Su-35 duke fluturuar afër një avioni luftarak amerikan F-16 më 23 shtator në një lëvizje të përshkruar si "të pasigurt" dhe "joprofesionale" që kishte "rrezikuar të gjithë". Pamjet e kabinës të publikuara nga ministria ruse e mbrojtjes më 24 shtator, pretendonin se tregonin një bombardues strategjik Tupolev Tu-95MS që fluturonte pranë bregut perëndimor të Alaskës dhe ky ishte një mesazh i guximshëm i Moskës për aleancën, në lidhje me aftësitë e saj. Muaji i kaluar ishte i ngarkuar për NORAD-in, i cili raportoi gjithashtu për dy avionë rusë patrullimi Ilyushin Il-38 dhe dy avionë rusë të zbulimit detar Tupolev Tu-142 afër Alaskës. Këto incidente ndodhën në Zonën e Identifikimit të Mbrojtjes Ajrore të Alaskës që rrethon hapësirën ajrore sovrane të SHBA-së dhe Kanadasë, ku avionët kërkojnë autorizim për të hyrë ose mund të përballen me ndjekjen. NORAD ka thënë se aktiviteti i Rusisë "nuk shihet si kërcënim" dhe Moska ka theksuar se fluturimet e saj janë bërë mbi "ujra neutrale", por ato vijnë në mes të tensioneve të rritura pas pushtimit të plotë të Ukrainës nga Vladimir Putin. Mijëra kilometra dhe 11 zona kohore larg, Eurofighter-at e NATO-s të stacionuar në Letoni u ngritën në fluturim më 20 dhe 21 shtator për të shoqëruar avionët rusë pranë kufirit të Letonisë me Bjellorusinë. Suedia dhe Finlanda, anëtarët më të rinj të NATO-s, kanë raportuar gjithashtu shkelje të tjera të hapësirës së tyre ajrore nga avionët ushtarakë rusë në muajt e fundit. Këto incidente janë shtuar shumë që pas fillimit të luftës në ukrainë, por rastet e fundit ka gjasa të lidhen me kërkesën e ukrainës për të hequr kufizimet mbi përdorimin e municioneve me rreze të gjatë veprimi. Kur avionët ushtarakë rusë fluturojnë pranë hapësirës ajrore të NATO-s, transponderët e tyre zakonisht fiken, që do të thotë se avionët nuk transmetojnë kode që identifikojnë llojin, pozicionin dhe lartësinë e tyre.