Një zjarr i përmasave të mëdha përfshiu Pyllin e Sodës në Vlorë pasditen e kësaj të diele. Flakët të ndihmuara nga temperatura e lartë dhe era u përhapën me shpejtësi brenda pyllit me pisha ndërsa një re e dendur tymi mbuloi të gjithë zonën. Menjëherë pas sinjalizimit, drejt zonës u nisën forcat e Policisë dhe shërbimet zjarrfikëse, të cilat po punojnë për izolimin dhe shuarjen e flakëve. Sipas të dhënave paraprake, situata paraqitet e vështirë për shkak të përhapjes së zjarrit në një zonë me bimësi të dendur dhe erës që favorizon avancimin e flakëve. Burime nga shërbimi zjarrfikës bëjnë me dije se aktualisht ne Vlorë janë aktive pesë vatra zjarri njëkohësisht, çka ka vështirësuar ndarjen e forcave në terren. Përveç zjarrit në Pyllin e Sodës, ndërhyrje po kryhen edhe në Dukat, pranë tunelit të Llogarasë, në zonën e Parkut të Mallrave dhe në Triport. Ndërkohë vijon puna për përcaktimin e shkaqeve të zjarrit, të cilët dyshohet që të jenë të qëllimshëm