Një aksident rrugor është regjistruar në autostradën Durrës-Tiranë, ku drejtuesi i një automjeti ka humbur kontrollin e mjetit dhe është përplasur me shtyllën anës rrugës. Pas përplasjes, automjeti tip Audi A7 është përfshirë nga flakët dhe është shkrumbuar plotësisht. Sipas informacioneve paraprake, shoferi ka arritur të dalë në kohë nga makina dhe nuk ka pësuar lëndime. Në vendngjarje kanë mbërritur forcat zjarrfikëse, të cilat kanë ndërhyrë për shuarjen e flakëve, ndërsa qarkullimi në këtë segment është bllokuar përkohësisht. Burime nga zona bëjnë me dije se në ngjarje janë përfshirë edhe dy ose tre automjete të tjera. Deri tani raportohet vetëm për dëme materiale, ndërsa priten sqarime të mëtejshme nga autoritetet.