Dita u shndërrua shkurtimisht në natë në Spanjë të mërkurën, ndërsa vendi pa eklipsin e parë total diellor në më shumë se një shekull, duke e zhytur atë në errësirë të frikshme në një nga spektaklet më të mëdha të natyrës. Shkëlqimi spektral i koronës së jashtme të Diellit, që shkëlqente nga skajet e Hënës në hije, shkaktoi gulçime dhe brohoritje nga turma të mëdha, vetëm 90 minuta pasi u shfaq për herë të parë në rajonin e largët Arktik të Rusisë veriore. "Është një pamje që nuk do ta kisha imagjinuar kurrë ta shihja," tha Isabel Troyano, një 56-vjeçare, që e pa ekslipsin bashkë me djalin e saj në Tarragona, në bregdetin mesdhetar të Spanjës. “Mu bë mishi me mornica”, shtoi ajo. Alejandro Cuesta, një studiues 30-vjeçar i nanoshkencës, e konsideroi pamjen "të pabesueshme... "Ishte madhështore... gjëja më e bukur që kam parë në të gjithë jetën time." Eklipsi - i pari në Evropën kontinentale që nga viti 2006 - hodhi hijen e tij nëpër pjesë të Groenlandës, duke vrapuar më pas për në jug për të mbuluar Keflavikun, rreth 50 kilometra nga kryeqyteti i Islandës, Reykjavik, përpara se të përshkonte Oqeanin Atlantik drejt Spanjës veriore. Reykjaviku nuk kishte parë një eklips total diellor që nga viti 1433, dhe tjetri nuk pritej deri në vitin 2196.