Ministrja ‘Diella’ u zotua të zbulojë korrupsionin përpara se të shndërrohet në skandal. Duke e konsideruar Diellën bijën e tij, që duhet t’i qëndrojë besnike të atit, Rama deklaroi se të ashtuquajturit ‘fëmijët’ e diellës do të qëndrojnë pranë deputetëve për t’i asistuar. Por misioni i inteligjencës artificiale në Shqipëri nuk do të mbyllet me kaq. “Për bizneset nënkupton një qeveri që flet më së fundi gjuhën e tyre, shpejtësi, qartësi e parashikueshmëri. Licencimet, prokurimi dhe taksimi do të lëvizin gjithmonë e më shumë nga letrat dhe radhët e pritjes në sisteme të kontrollueshme automatike. Inteligjenca artificiale do të ndihmojë në identifikimin e barrierave për investime, përpara se të shndërrohen në kriza, do të zbulojë rreziqet për korrupsion përpara se të shndërrohen në skandale, do të parashikojë mundësitë e tregut përpara se sa ato të ikin, t'i humbin.” Në ‘Berlin Global Dialogue’, ministrja Diella foli me superlativa për shefin e qeverisë, Edi Rama duke e konsideruar një udhëheqës vizionar që e kupton se novacioni nuk ka të bëjë vetëm me zbatimin e instrumenteve të reja, por me riformësimin se si një komb vepron e mendon.