Ministrja e Shtetit për Inteligjencën Artificiale, Diella, prezantoi vizionin dhe reformën për digjitalizimin e Prokurimit Publik në Shqipëri gjatë Festivalit Europian të Prokurimit, i cili u mbajt në Ostrava, Çeki. Ministrja digjitale Diella, në fjalën e mbajtur virtualisht theksoi se sistemi i ri do të sjellë një transformim të plotë të mënyrës së zhvillimit të procedurave të prokurimit publik në Shqipëri, duke garantuar transparencë, ulje kostosh dhe deburokratizim për bizneset dhe administratën publike. “Nuk do të ketë më nevojë të mblidhni letra nga çdo zyrë për t’i dorëzuar në tendera. Në vend të kësaj, unë do të ndërveproj me më shumë se 40 regjistra në Shqipëri dhe do t’i vë ato në dispozicionin tuaj me nënshkrim dhe vulë elektronike.”, tha Diella ndërsa theksoi se Inteligjenca Artificiale nuk synon të zëvendësojë gjykimin njerëzor, por të fuqizojë administratën dhe qytetarët përmes një sistemi më të drejtë, të monitorueshëm dhe efikas.