Aplikimi i inteligjencës artificiale në procesin e numërimit të votave për Bashkinë e Tepelenës e kaloi testimin me sukses dhe zbatimi i teknologjisë në proceset e ardhshme s’ka pse të përjashtohet. Komisioneri Shtetëror i Zgjedhjeve, Ilirjan Celibashi tha se testimi përmbushi pritshmëritë e KQZ. Testi i kryer ishte i suksesshëm dhe përmbushi të gjitha pritshmëritë tona. Leximi, dhe më pas numërimi e vlerësimi i fletëve të votimit, u krye me sukses të plotë duke përdorur Inteligjencën Artificiale. Pamjet filmike të përftuara gjatë numërimit dhe vlerësimit me dorë të fletëve të votimit u lexuan dhe u analizuan në kohë reale nga programi kompjuterik që bazohet në Inteligjencë Artificiale. Në përgjithësi, leximi dhe analiza e këtyre pamjeve prodhoi pothuajse 100% të njëjtin rezultat me atë që doli nga numërimi fizik i fletëve të votimit. Pamjet e faqes ballore të fletës së votimit – asaj që përmban emrat e kandidatëve – u lexuan me saktësi të plotë nga moduli i numërimit të automatizuar, pra sistemi i Inteligjencës Artificiale. Përdorimi i Inteligjencës Artificiale ishte një test teknik nëpërmjet të cilit KQZ provoi se sa e dobishme mund të jetë kjo teknologji në proceset zgjedhore. Pavarësisht aplikimit të inteligjencës artificiale, rezultati i nxjerrë prej saj nuk ishte zyrtari, pasi Kodi Zgjedhor ka parashikime strikte që saktësojnë se numërimi kryhet vetëm manualisht.