Ushtarë me uniforma mes plazhistëve mund të shiheshin në plazhet e Cancunit të dielën ndërsa roja kombëtare meksikane, u dislokua për të mbrojtur turistët nga një valë në rritje e dhunës së karteleve që ka marrë disa jetë njerëzish, përfshirë edhe turistë. Një batalion prej rreth 1500 ushtarësh u vendos në qytetet turistike dhe nisën patrullimin në plazhe. Foto impresionuese i tregonin ata të armatosur dhe ndërsa vuanin jo pak nën diellin e ngrohtë, në kontrast të dukshëm me plazhistët që shijonin kohën e nxehtë. Batalioni i sigurisë së turistëve i rojës kombëtare, u prezantua nga presidenti meksikan Andres Manuel Lopez Obrador më 17 nëntor, pas disa incidenteve që dëmtuan imazhin e rajonit, përfshirë vrasjen e dy turisteve femra, njëra prej të cilave jetonte në San hoze në Kaliforni. Një ekip prej 15 vrasësish me pagesë vrau liderët e dy bandave rivale në një plazh të Cancunit. Sulmi në mes të ditës detyroi turistët dhe punonjësit të kërkonin shpëtim në hotel para se bandat e armatosura të largoheshin me skafe. Të paktën 21 mijë persona janë vrarë që nga shtatori në incidente të dhunshme të lidhura me organizatat kriminale, sipas të dhënave të qeverisë.