Rusia liroi të enjten një shtetase me nënshtetësi të dyfishtë që ishte burgosur se kishte dhuruar 50 euro në ndihmë të Ukrainës, duke e shkëmbyer atë me një shtetas gjermano-rus të akuzuar për eksportimin e pajisjeve elektronike të ndjeshme amerikane për përdorim në ushtrinë ruse. Sekretari amerikan i Shtetit Marco Rubio tha se Ksenia Karelina, e cila u shpall fajtore vitin e kaluar për tradhti nga një gjykatë ruse për dhurimin e parave për një organizatë bamirësie me bazë në SHBA që ofronte mbështetje humanitare për Ukrainën, është duke u kthyer për në shtëpi. Avokati i saj konfirmoi për Reuters se Karelina ishte liruar si pjesë e një shkëmbimi me Arthur Petrov, një shtetas i dyfishtë gjermano-rus i arrestuar në vitin 2023 në Qipro me kërkesë të SHBA-së. Lajmin e raportoi fillimisht Ëall Street Journal. Drejtori i Agjencisë Qendrore të Inteligjencës John Ratcliffe dhe një zyrtar i lartë i inteligjencës ruse zhvilluan bisedime për shkëmbimin në Abu Dhabi, sipas një zyrtari të CIA-s të cituar nga Journal. "Sot, Presidenti Trump solli në shtëpi një tjetër amerikan të arrestuar gabimisht nga Rusia," tha Ratcliffe në një deklaratë. "Jam krenar për oficerët e CIA-s që punuan pa u lodhur për të mbështetur këtë përpjekje dhe ne vlerësojmë Qeverinë e Emirateve të Bashkuara Arabe që mundësoi shkëmbimin". Mësuesi amerikan Marc Fogel u lirua nga një burg rus në shkurt gjatë një vizite të të dërguarit të Trumpit për Lindjen e Mesme, Steve Ëitkoff, në Moskë. Princi saudit i kurorës Mohammed bin Salman dhe shefi i fondit të pasurisë sovrane të Rusisë Kirill Dmitriev ishin të përfshirë në negociata. Në gusht të vitit të kaluar, Shtetet e Bashkuara dhe Rusia kryen shkëmbimin e tyre më të madh të të burgosurve që nga Lufta e Ftohtë, me 24 të burgosur që fituan lirinë, mes tyre edhe gazetari amerikan Evan Gershkovich dhe ish marinsi Paul Ëhelan.