37-vjeçari Diomet Musa, autor i dyshuar i dhunimit të biznesmenit 52-vjeçar Arben Çipa doli këtë të dielë para gjykatës së Sarandës, e cila vendosi ta lë në arrest shtëpie. Masë kjo e kërkuar dhe nga prokurorja e çështjes. Musa akuzohet për veprën penale “plagosje e rëndë me dashje” në bashkëpunim. Pas dhunës së ushtruar ndaj biznesmenit 37-vjeçari u fsheh në një banesë në Lukovë, ku edhe u kap nga policia, ndërkohë që në kërkim mbetet nipi I tij 29-vjeçar Markelian Musa. 52-vjeçari pretendon se shkak për konfliktin, u bë një projekt që ai po bën me OSHEE për ndërtimin e një linje elektrike në zonën e Heremecit, ku do të ngre më pas një restorant. Ndërkohë dy të akuzuarit e kundërshtojnë me pretendimin se aty do të ndërtojnë një biznes vetë. Çipa kërkoi këtë të dielë ndërhyrjen e shtetit me argumentin se Saranda është duke u kontrolluar nga "të paprekshmit" dhe "të fortët" të cilët po janë në qendër konflikteve të pronësisë por edhe kërcënimeve të tjera ndaj qytetarëve.