Policia e Lezhës ka bërë të mundur identifikimin e autorit të dyshuar të sulmit të ndodhur mbrëmjen e kaluar në Rrilë, ku u dhunua rëndë 35-vjeçari Petrit Paloka. Sipas informacioneve nga grupi hetimor, identifikimi u bë pas analizimit të pamjeve të kamerave të sigurisë së disa bizneseve në zonë, të cilat kanë ndihmuar policinë të rindërtojë lëvizjet e automjetit që dyshohet se është përdorur nga autori. Gjithashtu, janë kryer disa kontrolle banesash. Ngjarja ndodhi në rrugën e Rrilës, ku Petrit Paloka, që po udhëtonte me një automjet tip “Golf 5”, u ndalua nga një makinë “Audi” e zezë. Personat e maskuar që ndodheshin në të e nxorën atë me forcë nga makina dhe e goditën me mjete të forta, mes tyre edhe me shkop bejsbolli. Për pasojë, ai mori plagë të rënda në trup dhe këmbë.