Pas dekadash pa dhunë politike të drejtuar ndaj një kandidati presidencial nga një prej partive kryesore, SHBA tani e ka përjetuar këtë dy herë në harkun e dy muajve, me ish-presidentin Donald Trump në shënjestër në të dyja rastet. Në mesin e korrikut, ai shmangu një plumb në kokë nga një person i armatosur në një tubim në Butler të Pensilvanisë. Sulmuesi 20-vjeçar u qëllua për vdekje nga një snajper. Dy muaj më vonë, të dielën pasdite, gjatë një loje golfi, ai ishte objektivi i dukshëm i një tjetër vrasësi të mundshëm, sipas FBI-së, me një të dyshuar tani në burg. Amerikanëve u është dashur të përshtaten me "normalet e reja" në politikë, të mëdha dhe të vogla, në dukje të rregullta vitet e fundit. Diskursi kombëtar është ashpërsuar, ndarjet mes partive janë thelluar dhe standardet për sjelljen e kandidatëve duket sikur janë shembur. Duke pasur parasysh epideminë kombëtare të dhunës me armë zjarri, këto lloj sulmesh janë ndoshta një tjetër normalitet i ri, i pashmangshëm, por për momentin, tronditës – shkruan BBC. “Dhuna nuk ka vend në Amerikë”, tha zëvendëspresidentja Kamala Harris, rivale e trumpit në zgjedhje, në një deklaratë pas incidentit në Florida. Detajet e tentativës së dukshme për vrasje, identiteti dhe motivimi i sulmuesit në veçanti, do të përcaktojnë përfundimisht ndikimin që kjo ka në politikën amerikane. Por, për momentin, duket sikur, pavarësisht komenteve të zëvendëspresidentes, kjo lloj dhune është gjithnjë e më shumë pjesë e Amerikës së sotme. Vetë Trump, në deklaratën e tij të parë pas tentativës së dukshme ndaj jetës së tij, premtoi se asgjë nuk do ta ngadalësonte ose do ta bënte të dorëzohej. Përgjigja është në një linjë me deklarimet e mëhershme se ish-presidenti është bërë objektiv i persekutimit dhe sulmit, sepse ai flet për amerikanët "e harruar". Fjalët e tij pas asaj që mund të kishte qenë për vetëm pak milimetra, vrasja e tij, në korrik: "luftoni, luftoni, luftoni", u bënë thirrje për përkrahësit e tij. “Ata nuk po vijnë pas meje, po vijnë pas jush”, i pëlqen Trumpit të thotë. "Unë thjesht qëndroj në mes". Tani ish-presidenti ka edhe një shembull tjetër dramatik që mund ta përdorë për të ilustruar pikëpamjen e tij. Ky incident i fundit mund të mos ketë peshën emocionale si atentati në Butler, të Pensilvanisë. Ai sulm ndodhi në një tubim publik, nën sytë e kamerave televizive, me ish-presidentin të gjakosur dhe sfidues. Një mbështetës u vra dhe dy të tjerë u plagosën po ashtu. Këtë herë, incidenti ndodhi në një fushë golfi në pronësi të Trump, me ish-presidentin larg rrezikut. Sidoqoftë, përpjekja e dukshme për vrasje do të gjenerojë tituj të rinj që të paktën përkohësisht do ta shkëpusin Trumpin nga sfidat e ditëve të fundit.