Pas incidentit të ndodhur gjatë protestës së të shtunës në Zvërnec, ka reaguar kompania e cila ka marrë përsipër projektin, “Zvërnec South Adriatic Development”. Në reagimin zyrtar thuhet se sjellja e shoqërisë së sigurisë ndaj protestuesve është e pajustifikueshme dhe e dënueshme penalisht. Për këtë arsye thotë kompania, është ndërprerë marrëdhënia me shoqërinë e sigurisë. “Ekzaminimi i materialeve e bën absolutisht të papranueshme vazhdimin e marrëdhënies kontraktuale me këtë shoqëri. Në asnjë moment, kompania e kontraktuar e sigurisë nuk ka pasur instruksione nga ana jonë për të vepruar në kundërshtim me autorizimet ligjore dhe në cenim të të drejtave të garantuara për qytetarët shqiptarë”. Teksa kërkon ndjesë për incidentin, kompania kërkon nga organet të kryejnë hetim të paanshëm të ngjarjes.