Lufta kundër mbjelljes dhe shitjes së kanabisit, vijon të jetë në fokusin e policisë së shtetit. Muaji maj shënoi disa operacione policore në të gjithë vendin, me qëllim goditjen e kultivimit dhe shitjes së lëndëve narkotike. Në kuadër të 18 operacioneve të zhvilluara, në vazhdën e planit operacional mbarëkombëtar “Territor i pastër”, policia asgjësoi 42 749 bimë dhe fidanë cannabisi. Po gjatë të njëjtës periudhë sekuestroi 181 kg cannabis sativa, 11.3 kg kokainë, mijëra doza të këtyre lëndëve, 470 doza heroine dhe 5000 fara cannabisi. Si dhe 10.5 milionë euro (para dhe asete) që dyshohet se kanë rrjedhur nga aktivitetit kriminal. 10 raste të tentativës për të kontrabanuar mallra të ndryshme, u goditën në Rinas, Morinë, Tiranë, Durrës dhe Korçë. Gjatë 31 ditëve të muajit maj, u finalizuan 4 operacione kundër transportimit të kundërligjshëm të emigrantëve dhe u bllokuan në kufi 168 emigrantë nga vendet e treta, të cilët tentuan të hynin ilegalisht në vendin tonë. Policia e shtetit po ashtu bëri me dije se janë evidentuar dhe trajtuar ligjërisht 121 raste të dhunës në familje, të cilat më pas janë adresuar për t’u trajtuar nga institucionet e kompetente.