Policia e Lezhës ka njoftuar nisjen e hetimeve për dhunën barbare ndaj ish kryetarit të PD në zonë, Sokol Toma mbrëmjen e 9 majit. Nëpërmjet një reagimi zyrtar, Policia e Lezhës ka bërë të ditur se janë sekuestruar pamjet filmike, që pritet të ndihmojnë në identifikimin e autorëve. ‘Në autostradën Mamurras–Laç, në afërsi të kryqëzimit të Sanxhakut, shtetas ende të paidentifikuar, kanë goditur me sende të forta, 53 vjeçarin Sokol Toma, të cilit i kanë shkaktuar dëmtime në trup. Grupi hetimor, në drejtimin e Prokurorisë, po vijon veprimet intensive, ka sekuestruar pamjet filmike të kamerave në një territor të gjerë, dhe po kryen një sërë veprimesh të tjera hetimore me qëllim zbardhjen e rrethanave, identifikimin dhe kapjen e autorëve” – njofton policia. Ndërkaq, Ministria e Shëndetësisë në reagimin e saj një ditë më parë ka bërë të ditur që Sokol Toma ndodhet nën monitorim intensiv në Spitalin e Traumës, me dëmtime në gjymtyrët e poshtme dhe në pjesën e veshit. 53 vjecari është i vetëdijshëm dhe në gjendje të qëndrueshme por do të vijojë të marrë trajtim mjekësor për shkak të dëmtimeve të shumta. Ish kreu i PD në Lezhë, Sokol Toma u bë viktimë e dhunës me sende të forta nga disa persna gjatë natës së 9 majit, por ngjarja u bë publike një ditë më pas.