Tifozët izraelitë dhe protestuesit u përleshën gjatë natës së kaluar pas ndeshjes mes Ajaxit dhe Maccabi Tel Aviv, tha policia holandeze të premten. Autoritetet holandeze thanë se tifozët izraelitë u sulmuan në mëyrë sistematike. Nuk është e qartë ndërkohë se si filloi dhuna. Liderët e Izraelit dhe Holandës dënuan dhunën duke e cilësuar si antisemitike. Videot nga Amsterdami gjithashtu shfaqin tifozët izraelitë duke brohoritur thirrje antiarabe në rrugët e qytetit. Kryebashkiakia e Amsterdamit, Femke Halsema, tha për gazetarët të premten se vëzhguesi kundër terrorizmit i Holandës theksoi se nuk kishte kërcënime konkrete ndaj tifozëve izraelitë të futbollit para ndeshjes. Peter Holla, shefi në detyrë i policisë së qytetit, tha në një konferencë për shtyp se tifozët “u sulmuan në mënyrë të qëllimshme”. Policia e Amsterdamit tha në rrjetet sociale se ka filluar një hetim të madh ndaj incidenteve të shumta të dhunës. Ajo nuk dha më shumë hollësi për të lënduarit apo të arrestuarit gjatë dhunës të enjten mbrëma, pas ndeshjes mes Ajaxit dhe Maccabi Tel Avivit në Ligën e Evropës. Ende nuk është e qartë se kur dhe ku shpërtheu dhuna. “Në disa pjesë të qytetit u sulmuan tifozët. Policia u detyrua të ndërhyjë disa herë, për t’i mbrojtur tifozët izraelitë dhe për t’i shoqëruar ata në hotele”, tha policia. Dhuna shpërtheu megjithëse ishte ndaluar një protestë propalestineze në afërsi të stadiumit. Halsema nuk kishte dhënë leje për protestë nga frika e përshkallëzimit të situatës. Transmetuesi holandez NOS raportoi se një flamur palestinez u gris në një ndërtesë në qendër të qytetit dhe se policia nuk i lejoi mbështetësit propalestinezë të marshonin drejt stadiumit ku po zhvillohej ndeshja. Izraeli fillimisht urdhëroi dërgimin e dy avionëve në kryeqytetin holandez për t’i kthyer izraelitët në shtëpi, por më vonë zyra e kryeministrit Benjamin Netanyahu tha se do të punojë “për të gjetur një zgjidhje për kthimin e qytetarëve përmes aviacionit civil”. Kryeministri i Holandës, Dick Schoof, tha në X se ishte i “tmerruar” nga raportimet për dhunë në Amsterdam.