Dhjetëra mijëra njerëz mbushën mbrëmjen e të shtunës rrugët e Tel Avivit dhe qyteteve të tjera izraelite për të kërkuar edhe një herë që qeveria të bëjë një marrëveshje për të liruar pengjet që ende mbahen nga Hamasi në Rripin e Gazës që nga 7 tetori. Demonstruesit kërkuan që kryeministri Benjamin Netanyahu t’i japë fund luftës në enklavën e rrethuar dhe të shkatërruar palestineze në mënyrë që të arrihet një marrëveshje për shkëmbimin e pengjeve për të burgosurit palestinezë që mbahen në burgjet izraelite. Protestat ishin më të mëdhatë që nga fillimi i konfliktit të armatosur. Lufta mes Izraelit dhe Hamasit nisi më 7 tetor kur krahu ushtarak i lëvizjes islamike palestineze hyri në izraelin jugor duke vrarë afro 1200 persona e duke marrë 251 pengje. Prej tyre, rreth 100 mbahen ende në rripin e gazës ndërsa të tjerët janë liruar në marrëveshje apo aksione të ushtrisë izraelite. Kjo e fundit sidoqoftë, thotë se beson se 41 pengje besohet se kanë vdekur. Në shenjë hakmarrjeje ndaj sulmit të paprecedentë të 7 tetorit, forcat e armatosura izraelite kanë nisur operacione në shkallë të gjerë në Rripin e Gazës që kanë i kanë marrë jetën të paktën 37,296 palestinezëve, me gjysmën e tyre që besohet se janë gra dhe fëmijë, sipas të dhënave të ministrisë së shëndetësisë në enklavën e qeverisur nga Hamasi.