Familjarët Eglant Koçi kanë konfirmuar në morgun e Tiranës se trupi i pajetë i gjetur në afërsi të fshatit Cërrujë, në malësinë mes Tiranës dhe Elbasanit i përket 34-vjeçarit. Hetimet e policisë kanë zbuluar deri më tani se autori i dyshuar, Armand Shakaj e ka qëlluar me një plumb pas koke 34 vjeçarin, para se të hidhte në humnerë. Trupi i 34-vjeçarit u gjet në proces dekompozimi, pas dy javësh kërkime nga forcat e policisë, të ndihmuar edhe nga forcat e sigurisë së Kosovës si edhe me dronë. Policia mbërriti në zonën ku ishte hedhur trupi i Koçit pas analizimit të qelizave telefonike të 41-vjeçarit Armand Shakaj. Grupi hetimor zbuloi se Shakaj kishte ndryshuar gjashtë herë numrat e telefonit ditën e ngjarjes, teksa e ka transportuar trupin e pajetë të 34-vjeçari me një karrotrec për të humbur gjurmët. 41-vjeçari Shakaj, njohur edhe me nofkën ‘Mand Dhelpra’ është ende në kërkim, teksa hetimet dyshojnë se shkak i vrasjes mund të jetë bërë aktiviteti i përbashkët mes viktimës dhe autorit në fushën e kriptomonedhave.