Zyrtarët po monitorojnë 200 persona, në 27 vende të botës, për ekspozim ndaj lisë së majmunëve pasi kishin hyrë në kontakt me një burrë në Dallas, që e kishte marrë sëmundjen gjatë një udhëtimi në Nigeri. Burri, emri i të cilit nuk është bërë publik, po kthehej nga Lagosi dhe kishte ndaluar në Atlanta, të Xhorxhias, më 8 dhe 9 korrik, gjatë rrugës për në Teksas, thuajse një javë para se të diagnostikohej me sëmundjen e rrallë. Lia e majmunëve shkakton një acarim therës të lëkurës dhe simptoma ethesh të ngjashme me gripin. Ajo mund të transmetohet përmes stërkalave dhe lëngjeve trupore. Pasi u diagnostikua, burri u vendos në izolim në një spital ku autoritetet thanë se ai është në gjendje stabël. Zyrtarët e CDC thanë se po punojnë me shtetin dhe me zyrtarët lokalë të shëndetësisë për të monitoruar ata që kanë hyrë në kontakt me pacientin dhe po i ndjekin ata në baza ditore deri në fund të muajit. Sidoqoftë, deri më tani nuk ka patur raste të tjera të lisë së majmunëve. Personat nën monitorim janë ata që kanë qenë pranë pacientit ose që kanë përdorur të njëjtin tualet me të në avionin me të cilin kishte udhëtuar.