Një 17-vjeçar është plagosur aksidentalisht gjatë natës në Tiranë, në zonën e njohur si kthesa e Kamzës. Ngjarja ka ndodhur rreth orës 01:40 në rrugën “Berit Beker”, ku i mituri është plagosur nga shoku i tij, Rigels Sylaj. Ky i fundit, duke i treguar armën e zjarrit pistoletë shokut në banesën e tij dhe duke menduar se nuk kishte fishek në fole, e ka shkrepur aksidentalisht dhe për pasojë 17-vjeçari është plagosur në kokë. I mituri është dërguar në spitalin e Traumës ku po merr ndihmë mjekësore, ndërsa 19-vjeçari është arrestuar për veprat penale “Plagosja e rëndë nga pakujdesia”, “Veprime që pengojnë zbulimin e së vërtetës” dhe “Mbajtja pa leje e armëve dhe municionit luftarak”. Po ashtu, në prangat e policisë janë arrestuar edhe 2 shokë të tjerë të 19-vjeçarit, 20 dhe 22 vjeç, të cilët fillimisht kanë tentuar të fshehin ngjarjen, duke deklaruar se të miturin e gjetën të plagosur. Dyshohet se të rinjtë para ngjarjes kanë konsumuar alkool, ndërkohë vijojnë hetimet për dokumentimin e plotë të rastit dhe sqarimin e të gjitha rrethanave të ngjarjes.