Aeroporti Ndërkombëtar i Tiranës ka nisur operimet me Finnair, linja ajrore kombëtare e Finlandës, e cila lidh Tiranën me Helsinkin përmes fluturimeve direkte që do të operojnë dy herë në javë, çdo të enjte dhe të diel. Hapja e këtij destinacioni shënon një hap të rëndësishëm në forcimin e lidhjeve të Shqipërisë me Evropën Veriore. I njohur për pozicionin e tij strategjik gjeografik, Aeroporti i Helsinkit shërben si një portë e shpejtë midis Evropës dhe Azisë. Fluturimi inaugurues u mirëprit në Aeroportin Ndërkombëtar të Tiranës me përfaqësues nga TIA dhe Finnair, në një ceremoni të dedikuar në pistë. Ky destinacion i ri pritet të tërheqë një profil të larmishëm pasagjerësh, duke u ofruar udhëtarëve në të njëjtën kohë akses të lehtë drejt Finlandës dhe lidhje të përshtatshme drejt destinacioneve kryesore në Evropën Veriore dhe Azi. Si porta kryesore e Shqipërisë, Aeroporti Ndëkombëtar I Tiranës luan një rol kyç në lidhjen e vendit me Evropën dhe më gjerë.