Hakerat iraniane që sulmuan të dhënat e institucioneve shqiptare tashmë po publikojnë detaje mjaft sensitive që zotërojnë autoritetet tona. Një nga këto të dhëna ka të bëjë me një informacion që Policia Shqiptare, në kohën kur drejtohej nga Gledis Nano, I ka përcjellë anti-terrorit të Kosovës, në lidhje me një atentat me snajpen ndaj Kryeministrit Albin Kurti. Në një dokument të bërë publik, këtë të hënë, nga hakerat, i cili dyshohet se është marrë nga emaili i Drejtorit të Përgjithshëm të Policisë së Shtetit në vitin 2021, Gledis Nano, theksohet se Njësia Kundër Terrorizmit në Kosovë ka marrë informacione për atentat ndaj kryeministrit të Kosovës, Albin Kurti, ndaj Ismet Haxhës, ish-anëtar i Shërbimit Informativ të Kosovës dhe ndaj Xhavit Halitit, anëtar i Partisë Demokratike të Kosovës. Atentati me snajper dyshohet se do të kryhej nga Prek Kodra, shtetas shqiptar. Në dokument theksohet se ai ka aftësi të mira në përdorimin e snajperëve dhe se është përfshirë në disa vrasje në Kosovë dhe Mal të Zi. Kodra mendohet se jeton në Shkodër, ndërsa vepron në Tropojë, Ferizaj dhe Deçan të Kosovës.