Kancelari i Austrisë, Karl Nehammer, njoftoi se do të japë dorëheqje në ditët në vijim. Ai tha se do të largohet edhe nga detyra si lider i partisë, pas dështimit të bisedimeve për të formuar një koalicion qeveritar. Kancelari tha se partia e tij dhe Social Demokratët nuk ranë dakord për çështjet e ngritjes së koalicionit. Po ashtu nga diskutimet u tërhoqën edhe neoliberalët. Në shtator, Partia e Lirisë – e së djathtës ekstreme –shënoi fitore të pashembullt në zgjedhjet e përgjithshme të Austrisë, mirëpo partitë tjera patën thënë se nuk formojnë koalicion me liderin e këtij subjekti politik, Herbert Kickl. Kjo forcë politike që dhe më herët ka qenë në pushtet, ka marrëdhënie miqësore me Rusinë. Zgjedhjet e parakohshme kanë rritur shpresën në radhët e kësaj force, ku sipas sondazheve ka rritur akoma më shumë mbështetjen e saj që nga shtatori. Partia e Lirisë është themeluar nga ish-nazistët në vitet ’50. Ndërkohë emigrimi, lufta në Ukrainë por dhe çështje të tjera kanë qenë fokusi i fushatës së kësaj partie.