Me premtimet e tij të fushatës për të sjellë shpejt paqen në Gaza dhe Ukrainë që kanë mbetur pa plotësuar, Presidenti i SHBA Donald Trump është pozicionuar tani përballë një sfide tjetër të profilit të lartë, që mund të jetë po aq e pakapërcyeshme: frenimi i programit bërthamor të Iranit. Administrata e tij planifikon një raund të dytë bisedimesh me Iranin të shtunën në Romë që pakkush e mendoi të mundshëm pas vitesh armiqësish që datojnë që nga mandati i parë i presidentit republikan, kur ai anuloi një marrëveshje bërthamore të vitit 2015 dhe nisi një fushatë "presioni maksimal" me sanksione gjymtuese. Ndërsa askush nuk po përjashton mundësinë për përparim pas një takimi në Oman fundjavën e kaluar që të dyja palët e përshkruan si pozitiv, negociatorët po ulin pritshmëritë për një përparim të shpejtë në mosmarrëveshjen që zgjat me dekada. Debati mbi elementët e një marrëveshjeje të mundshme kornizë për programin bërthamor është në një fazë shumë të hershme mes ndihmësve të Trumpit, tha një burim i informuar mbi një takim në Shtëpinë e Bardhë me presidentin të martën. Të dyja palët mund të arrijnë një marrëveshje të përkohshme përpara një marrëveshjeje më të detajuar, thanë dy burime të njohura me qasjen e Shtëpisë së Bardhë. Ajo cka ndez tensionet rajonale që rrethojnë përpjekjet diplomatike, është kërcënimi i përsëritur i Trump për të bombarduar objektet bërthamore të Iranit nëse një marrëveshje nuk arrihet. Kjo do të thotë se Trump, i cili u zotua në fjalimin e tij inaugurues të 20 janarit se do të ishte një "paqebërës", mund ta përfshijë SHBA-në në një konflikt të ri në Lindjen e Mesme. Trump tha të enjten se nuk kishte nxitim për të goditur Iranin, duke këmbëngulur se negociatat ishin opsioni i tij i parë. “Nëse ka një opsion të dytë, mendoj se do të ishte shumë keq për Iranin”, tha Trump. "Unë mendoj se Irani dëshiron të bisedojë. Shpresoj se ata duan të bisedojnë. Do të jetë shumë mirë për ta nëse e bëjnë", tha ai. Drejtues i ekipit negociator të SHBA-së është Steve Ëitkoff, një mik i Trump dhe investitor i pasurive të paluajtshme, pa përvojë të mëparshme diplomatike, të cilin disa analistë e kanë quajtur "i dërguari i administratës për gjithçka". Ai është ngarkuar me arritjen e një marrëveshjeje me Iranin, përveç përfundimit të luftërave në Gaza dhe Ukrainë, të cilat vazhdojnë të dyja. Në anën tjetër të tryezës së bisedimeve ndërkohë është ministri i jashtëm i Iranit, Abbas Araqchi, një negociator mendjemprehtë, për të cilin disa diplomatë perëndimorë shqetësohen se do të përfitojë nga mungesa e ekspertizës së Ëitkoff.