Presidenti ukrainas, Volodymyr Zelensky, e ka pranuar për herë të parë që ushtria e tij është duke kryer ofensivë brenda rajonin perëndimor rus, Kursk. Ai tha përmes një fjalimi video të shtunën se ushtria ukrainase po e dërgon luftën në “territorin e agresorit”. Kievi ka nisur një sulm të papritur të martën dhe ka avancuar shpejt, më shumë se 10 kilometra brenda Rusisë, duke shënuar ndërhyrjen më të thellë që kur Moska nisi luftën në Ukrainë, në shkurt të vitit 2022. Në Ukrainë, Kievi dhe disa rajone tjera janë përballur me sulme me raketa dhe dronë të rusisë, në orët e para të së dielës, thanë zyrtarët lokalë. Sipas tyre, një burrë 35-vjeçar dhe djali i tij katërvjeçar u vranë në rajonin e Kievit, si pasojë e sulmeve me raketa. Është raportuar edhe për plagosjen e një 13-vjeçari në atë rajon. Zelensi ka falënderuar të shtunën “luftëtarët” e Ukrainës, dhe tha se e ka diskutuar operacionin në Rusi, me komandantin e ushtrisë ukrainase, Oleksandr Syrskyi. “Ukraina është duke dëshmuar që mund të rikthejë drejtësinë dhe të garantojë presion ndaj agresorit”, tha ai. Deri më tani Rusia nuk ka arritur të pengojë avancimin ukrainas. Më shumë se 76.000 njerëz janë evakuuar nga rajoni i Kurskut dhe autoritetet kanë nisur të zbatojnë masa kundër terrorizmit në atë zonë, dhe rajone të tjera kufitare.