Deputetja Marjana Koçeku ka bërë të ditur përmes një statusi në rrjetet sociale se nuk do të jetë më pjesë as e grupit parlamentar të Partisë Socialiste dhe as e Partisë Socialiste, duke deklaruar se do të vijojë mandatin si deputete e pavarur. Ajo thekson se vlerat dhe idealet e saj kanë qenë të pandryshuara edhe para angazhimit politik me PS, duke shtuar se ato përbëjnë kufirin e saj personal në jetën publike. “Prej sot jam deputete e pavarur. Idealet e vlerat e mia janë ato që i kam pas e i kam shprehë qysh para se të asociohem me një parti. Ato m’i diftojnë kufijtë”, shkruan ajo. Koçeku ishte supriza në listën e PS-së në Qarkun e Shkodrës në zgjedhjet e majit të vitit të kaluar. Ajo u katapultua e para në listë në listën e kandidatëve për deputetë, një pozicion që i dha asaj një rol të rëndësishëm në përfaqësimin e kësaj force politike në zonë. Më herët, Koçeku ka qenë e angazhuar në një biznes të vogël agroturizmi në vendlindje.