Deputeti i Bundestagut gjerman, Andreas Mayer, i drejtoi pyetje qeverisë federale lidhur me mbajtjen në paraburgim të kryebashkiakut të zgjedhur të Tiranës, Erion Veliajt prej tetë muajsh, duke kërkuar sqarime sesi kjo ndikon në integrimin europian të Shqipërisë dhe në perceptimin e sistemit të drejtësisë në vend. Deputeti gjerman i ka drejtuar pyetjen qeverisë federale nëse është njohur me raportimet mediatike, sipas të cilave në Shqipëri ka ndërhyrje në autonominë e pushtetit vendore, dhe nëse po, cilat përfundime nxjerr pala gjermane lidhur me procesin e anëtarësimit të Shqipërisë në BE? Në përgjigjen e saj, Qeveria Federale Gjermane thekson se: “Ashtu si Gjermania, edhe Shqipëria e ka ratifikuar Kartën Evropiane të Vetëqeverisjes Vendore dhe është zotuar për respektimin e pavarësisë politike, administrative dhe financiare të njësive vendore. Qeveria Federale po ndjek zhvillimet përkatëse dhe do të ndjekë me vëmendje të veçantë rezultatet e vizitës së ardhshme të rregullt të monitorimit nga Kongresi i Pushteteve Vendore dhe Rajonale të Evropës në kuadër të Kartës”, thuhet në përgjigjen e qeverisë federale gjermane.