Qeveria e Kosovës i ka kërkuar Bashkimit Evropian të bëjë më shumë për ta dënuar deklaratën e ministres serbe Snezhana Paunovic për spastrim etnik në Kosovë, duke thënë se përgjigja fillestare e bllokut evropian ishte e kufizuar dhe e vonuar. Ministri i Punëve të Jashtme i Kosovës, Glauk Konjufca, në një letër drejtuar përfaqësueses së lartë të Bashkimit Evropian për Politikë të Jashtme dhe Siguri, Kaja Kallas, ka kërkuar nga Brukseli të dënojë publikisht deklarimin fashist të ministres serbe Snezhana Paunoviç. Në ketë letër, e cila mban datën 16 korrik, kërkohet që të dënohen qartë dhe publikisht deklaratat e ministres Paunovic, tu bëhet e qartë autoriteteve serbe se një retorikë e tillë është e papranueshme dhe në kundërshtim me vlerat evropiane, si dhe ta trajtojë këtë çështje seriozisht në kuadër të dialogut politik dhe procesit të anëtarësimit të Serbisë në BE. Deklarata e Paunovic është dënuar tashmë nga BE-ja dhe dënimin e përsëriti të enjten komisionarja për Zgjerim, Marta Kos, duke thënë se ishte e habitur se si ajo vazhdon të mbetet ministre në Qeverinë serbe.