Një ish-kryebashkiake nga Filipinet, e cila u akuzua për spiunazh për Kinën, është shpallur fajtore për trafikim qeniesh njerëzore. Të enjten, ajo dhe tre të tjerë u dënuan me burgim të përjetshëm dhe një gjobë prej 2 milionë pesos. Rasti i Alice Guo ka përfshirë Filipinet për vite me radhë në një debat të madh, pasi autoritetet zbuluan një nga qendrat më të mëdha të mashtrimit në vend në qytetin e saj të vogël Bamban. Rreth 800 filipinas dhe të huaj u shpëtuan mnga qendra e mashtrimit pas një bastisjeje. 35-vjeçarja, e cila u arrestua vitin e kaluar pasi qëndroi në arrati për javë të tëra, i ka mohuar të gjitha akuzat kundër saj. Nuk është ende e qartë nëse ajo mund të apelojë vendimin e dhënë. Ka ende pesë raste në vazhdim kundër Guo-s, që po hetohen përfshirë një ku ajo është akuzuar për pastrim parash. Në vitin 2022, Guo u zgjodh kryebashkiake e Bambanit, në veri të kryeqytetit Manila. Banorët e Bambanit i thanë më parë BBC-së se ajo shihej si një udhëheqëse e kujdesshme dhe empatike. Por në vitin 2024, qyteti i qetë u vu në qendër të vëmendjes kombëtare pasi autoritetet zbuluan atje kazinotë online në shërbi të kientëve nga Kina. Fillimisht, Guo mohoi të kishte dijeni për kompleksin, por një hetim i senatit që pasoi vuri në dyshim paaftësinë e saj për të zbuluar qendrën prej tetë hektarësh që ndodhej pranë zyrës së saj. Më vonë doli se kompleksi - i cili përmbante 36 ndërtesa - ishte ndërtuar në tokë që Guo e zotëronte më parë. Ata gjetën gjithashtu mospërputhje në historinë e jetës së saj - ajo nuk kishte lindur në Filipine, siç kishte pretenduar, por kishte emigruar nga Kina me familjen e saj kur ishte adoleshente. Deputetët më vonë zbuluan se gjurmët e gishtërinjve të saj përputheshin me ato të një shtetaseje kineze të quajtur Guo Hua Ping. Ajo u shkarkua shpejt nga detyra. Dhe ndërsa dolën në dritë më shumë detaje rreth çështjes, ajo u zhduk në korrik 2024, duke nxitur një operacion ndërkombëtar në katër vende për ta rikthyer atë.