“Dënimi i Tahirit është vetëm fillimi, nisja e rugëtimit të ndëshkimit të abuzuesve me pushtetin.” Kështu e cilëson Partia Demokratike dënimin me 3.4 vite burg të ish-ministrikt të Brendshëm Saimir Tahiri nga Gjykata e Posaçme e Apelit, e cila e shpalli fajtor për veprën penale ‘shpërdorim detyre’. Përmes një deklarate për mediat nga selia blu, deputeti demokrat Ervin Salianji deklaroi se dënimi i Tahirit është prova e plotë se Shqipëria nën qeverisjen e Rilindjes u kthye në parajsën e drogës. : Shpallja fajtor e ministrit të Ramës dhe zbardhja e lidhjeve të tij me bandat e krimit të organizuar të trafikut të drogës, janë prova se PD kishte të drejtë në denoncimet e saj. Nëse do të ishin dëgjuar në kohën e duhur, sot Shqipëria nuk do ishte në këtë situatë kriminale dhe paratë e drogës nuk do ishin investuar për blerjen e zgjedhjeve e në ndërtim.