Këtë të shtunë, më 23 maj do të zhvillohen zgjedhjet për kreun e ri të Partisë Demokratike, me garues të vetëm kryetarin aktual të kësaj force politike, Sali Berisha. Procesi zgjedhor do të zhvillohet sipas standardit ‘1 anëtar, 1 votë’ në të 77 degët e partisë, ku do të ngrihen qendra votimi, të cilat do të hapen në orën 08:00 të mëngjesit dhe do të mbyllen në orën 18:00 të pasdites. Sipas një deklarate të mëhershme nga Sekretari për Cështjet Ligjore në PD, Ivi Kaso në degët më të mëdha do të ketë më shumë se një qendër votimi. Ai e ka cilësuar po ashtu procesin si referendum ku do të ushtrohet demokracia, duke theksuar se që nga ngritja e Komisionit të Rithemelimit, PD ka zhvilluar 7 procese zgjedhore të hapura, të drejtpërdrejta dhe demokratike. Në garën për kreun e PD më herët dorëzuan kandidaturën Ervin Salianji, Mereme Sela, Vladimir Mulaj, Alesia Balliu dhe Evi Kokalari, por kandidaturat e tyre u refuzuan, me arsyen se nuk plotësonin kriteret.