Pamjet satelitore të publikuara gjatë 24 orëve të fundit kanë zbuluar prova të dëmtimit të mundshëm të një baze ajrore iraniane pas sulmit izraelit të kryer në orët e para të mëngjesit të së premtes. BBC ka analizuar imazhe që tregojnë se një pjesë e një sistemi të mbrojtjes ajrore në një aeroport në Isfahan është dëmtuar. Zyrtarët amerikanë thonë se Izraeli kreu një sulm me raketa edhe pse nuk pati asnjë konfirmim zyrtar nga vendi. Tensionet mes rivalëve të ashpër u intensifikuan javët e fundit. Një sulm i mëparshëm i izraelit mbi konsullatën iraniane në Siri, në fillim të muajit u pasua nga një sulm hakmarrës nga Irani ndaj Izraelit më 13 prill. Që nga lajmet për sulmin izraelit të së premtes në Isfahan, vendi që konsiderohet edhe si djepi i programit bërthamor të Iranit, ka pasur spekulime rreth objektivit të mundshëm dhe masës së dëmit. Irani thotë se sulmi përfshinte dronë që u neutralizuan nga mbrojtja ajrore. Ndërsa mbetet e paqartë se çfarë arme apo armësh janë përdorur në sulm, imazhet satelitore kanë zbuluar prova të dëmtimit në bazën ajrore. Imazhet tregojnë dëmtimin e mundshëm të një sistemi të mbrojtjes ajrore S-300 të vendosur në cepin veriperëndimor të bazës ajrore Shikari. Imazhet janë bardh e zi, por me rezolucion të lartë. Po ashtu ato tregojnë dëme dhe mbeturina rreth një komponenti, ndoshta një radar, i cili gjithashtu ka ndryshuar pak pozicionin. Automjetet e tjera janë larguar nga vendi.