Hiri vullkanik ka mbuluar pistën e uljes së avionëve e kjo ka penguar përpjekjet e ndihmës në Tonga, ndërsa shkalla e dëmeve nga shpërthimi vullkanik që shkaktoi një tsunami, po nis të bëhet e qartë. Zelanda e re po përpiqet të dërgojë ujë të pijshëm dhe ndihma të tjera, por avionët nuk mund të ulen në aeroportin kryesor. Disa nga ishujt e vegjël rreth Tongës kanë pësuar dëme të mëdha sipas raporteve. Momentalisht, dy persona janë raportuar të vdekur, por me komunikimin shumë të kufizuar, ekziston frika se bilanci i viktimave mund të jetë shumë më i lartë. Një vullkan nënujor shpërtheu të shtunën, duke e mbuluar Tongën me hi e duke shkaktuar edhe një tsunami. Tonga përbëhet nga më shumë se 170 ishuj të vegjël të shpërndarë në një zonë në jug të paqësorit, me përmasa thuajse sa të japonisë. Vetëm pak më shumë se 100 mijë njerëz jetojnë në Tonga, pjesa më e madhe e tyre në ishullin kryesor, Tongatapu. Fluturimet e mbikqyrjes nga ajri treguan se fshatra të tërë janë shkatërruar dhe ndërtesat janë rrafshuar me tokën. Kjo ka bërë që zyrtarët të druajnë më të keqen, por do të duhen ditë që gjithcka të zbardhet. Komunikimet me ishujt janë ndërprerë pasi një kabull i vetëm nënujor që lidh tongën me pjesën tjetër të botës u këput si pasojë e shpërthimit vullkanik.