Gjykata e Apelit ka liruar nga burgu mjekun kardiolog Edvin Prifti, ndërsa në fuqi mbetet masa e pezullimit nga detyra. Apeli ka lënë si masë sigurie “detyrim paraqitje” për shefin e kardiokirurgji në Qendrën Spitalore Universitare “Nënë Tereza”, Edvin Prifti. Mësohet se Apeli ka lënë në fuqi arrestin me burg për gjyqtaren Enkelejda Hoxha dhe avokatin Aldo Tabaku, ky i fundi si sekser në aktivitetin e paligjshëm të përfaqësueses së Drejtësisë. Prifti doli në përgjime në kuadër të operacionit për arrestimin e gjyqtares Enkelejda Hoxha. Në përgjime rezultoi se mjeku kishte komunikuar me sekretaren e Gjykatës së Krujës, ku kjo e fundit i kërkonte favor për të asistuar në operacionin e nënës së saj. Ndërkohë, pas kontrollit të SPAK në shtëpinë dhe zyrën e mjekut, u gjetën 250 mijë euro dhe 160 mln lekë të vjetra. Me vendim gjykate, kardiokirurgu kishte marrë masën e pezullimit nga detyra, por prokuroria pas kontrollit në banesën e tij kërkoi t’i shtohet akuza e pastrimit të parave.