Demokratët kërkojnë verifikim të thelluar për kryetarin e Bashkisë së Malësisë së Madhe Tonin Marinaj, nga Prokuroria e Përgjithshme, me pretendimin se ekziston një dyshim I arsyeshëm, se Marinaj është në kushtet e ndalimit për të kandidaur dhe për t’u zgjedhur. Sipas demokratëve ekzistojnë të dhëna dhe informacione, që ngrenë dyshimin e arsyshëm, se subjekti Tonin Marinaj, ka kryer veprimtari të paligjshme, duke sjellë në vëmendje një hetim të bërë ndaj këtij të fundit nga antimafia italiane. Sipas grupit të PD, referuar hetimeve italiane, rezulton se Marinaj është në rolin e themeluesit, nxitësit dhe drejtuesit të një organizatë kriminale e përbërë prej më shumë se dhjetë anëtarësh, me tipare ndërshtetërore, me baza vepruese në Shqipëri dhe Itali, e angazhuar sistematikisht, profesionalisht dhe në vazhdimësi në eksportimin në territorin italian të sasive të mëdha të mariuanës për t’u shpërndarë me pakicë nga anëtarët e organizatës kriminale.