Ministria e Jashtme thotë se dënon me forcë heqjen dhe përdhosjen, sipas saj, të flamurit të Ambasadës së Shtetit të Izraelit në Tiranë nga protestues të maskuar gjatë protestës së të shtunës. ‘Veprime të tilla nuk kanë asnjë lidhje me lirinë e shprehjes, të drejtën legjitime për protestë paqësore apo me vlerat tona demokratike dhe standardet evropiane që kemi ndërtuar dhe po forcojmë çdo ditë. Ato janë shfaqje të urrejtjes, intolerancës dhe nxitjes së saj, dhe janë krejtësisht të papajtueshme me parimet e respektit dhe bashkëjetesës që Shqipëria i ka në themel dhe i çmon me përkushtim’, thuhet në deklaratë. Ministria e Jashtme deklaron se akti bie ndesh me traditën shqiptare të mikpritjes, harmonisë dhe respektit për tjetrin.