Ushtruesja e detyrës së Presidentes së Republikës së Kosovës, Albulena Haxhiu, ka reaguar ndaj deklaratave të zyrtarëve serbë, Aleksandar Vuçiç dhe Ana Bërnabiq, duke i cilësuar ato si vazhdimësi të gjuhës së mohimit, urrejtjes dhe propagandës mbi të cilën, sipas saj, u ndërtua politika shoviniste dhe ekspansioniste e regjimit të Slobodan Millosheviç. Përmes një reagimi në rrjete sociale, Haxhiu shkruan se ndërsa qytetarët e Kosovës ende presin zbardhjen e fatit të personave të zhdukur gjatë luftës, Serbia vazhdon të mohojë shtetësinë e Kosovës dhe të ripërtërijë pretendimet territoriale ndaj saj. Ajo thekson se faktet janë të pakontestueshme dhe se Serbia nuk mund të pretendojë se është e përkushtuar ndaj paqes, kur nuk hap arkivat për personat e zhdukur, nuk bashkëpunon për zbardhjen e krimeve të luftës dhe vazhdon ta trajtojë Kosovën si territor të vetin.