Tirana zyrtare dënoi deklaratën tronditëse të ministres serbe, Snezhana Paunoviç, e cila tha se nëse do të ishte në vendin e Sllobodan Millosheviçit në vitin 1998, do ta spastronte etnikisht Kosovën. Shefi i diplomacisë, Ferit Hoxha vlerësoi se normalizimi i një prej krimeve më të rënda kundër njerëzimit, bie ndesh me vlerat dhe parimet mbi të cilat është ndërtuar Europa. FERIT HOXHA: “Askush nuk mund të ndërtojë besim duke rikthyer hijet më të errëta të së kaluarës, aq më pak duke lartësuar politika dhe figura që mbajnë përgjegjësi për tragjedi, vuajtje dhe krime që kanë lënë gjurmë të thella në historinë e rajonit tonë sic është "kasapi i Ballkanit". Procesi i normalizimit dhe i pajtimit, për të cilin Kosova, Serbia dhe i gjithë rajoni ynë kanë aq shumë nevojë, kërkon para së gjithash përgjegjësi, reflektim dhe guxim për t’u përballur me të kaluarën. Ai nuk mund të ndërtohet kurrë mbi deklarata që justifikojnë apo lartësojnë politikat që sollën aq shumë dhimbje e shkatërrim, por vetëm e vetëm mbi të vërtetën, respektin për viktimat dhe angazhimin e sinqertë për një të ardhme të përbashkët evropiane.”