Biseda e tensionuar mes Presidentit të Francës, Emmanuel Macron, dhe atij të Rusisë, Vladimir Putin, vetëm pak ditë para se Rusia të pushtonte Ukrainën është zbuluar nga mediat franceze. Ato kanë publikuar transkriptin e negociatave mes dy liderëve, gjatë një bisede telefonike, që nis me fjalët e Macron “Vladimir, së pari një gjë”, por që ndërpritet direkt nga udhëheqësi rus “Dëgjo Emmanuel”. Thirrja telefonike u bë mëngjesin e 20 shkurtit, ndërsa udhëheqësi francez bëri atë që doli të ishte një përpjekje e pafrytshme për të ndaluar Rusinë që të shkonte në luftë. Macron e pyet troç Presidentin rus: “Do të dëshiroja që së pari të më jepni leximin tuaj të situatës dhe ndoshta drejtpërdrejtë, siç është zakoni ynë, të më tregoni se cilat janë qëlimet tuaja”. “Çfarë mund të them? Ju vetë e shihni se çfarë po ndodh”, i përgjigjet Putin, duke akuzuar Ukrainën për prishjen e marrëdhënieve.