Dëbimi i emigrantëve të paligjshëm me avionë ushtarakë nga Presidenti amerikan Donald Trump për në Guatemalë, të hënën, me shumë gjasa do të kushtojë të paktën 4675 dollarë për emigrant, sipas të dhënave të ofruara nga zyrtarët e SHBA-së dhe Guatemalës. Kjo është më shumë se pesëfishi i kostos prej 853 dollarësh të një bilete të klasit të parë me një drejtim në American Airlines nga El Paso e Teksasit, që ishte edhe pika e nisjes për fluturimin, sipas një rishikimi të tarifave ajrore të disponueshme publikisht. Shifra është gjithashtu dukshëm më e lartë se kostoja e një fluturimi tregtar çarter nga zyra e emigracinit dhe doganave të SHBA. Trump nisi dëbimet me avionë ushtarakë javën e kaluar si pjesë e deklaratës së tij të emergjencës kombëtare për emigracionin, duke dërguar deri më tani gjashtë avionë me emigrantë për në Amerikën Latine. Vetëm katër kanë zbritur, të gjithë në Guatemalë, pasi Kolumbia refuzoi të lejonte dy avionë C-17 të zbarkojnë dhe në vend të tyre, dërgoi avionët e saj, për të marrë emigrantët pas një përplasjeje me Trumpin. Një zyrtar amerikan, duke folur për Reuters në kushte anonimiteti, vlerësoi se kostoja e operimit të një avioni transporti ushtarak C-17 është 28,500 dollarë në orë. Fluturimi për në Guatemalë dhe kthimi mbrapsht, duke mos përfshirë kohën e qëndrimit në tokë ose operacionin e përgatitjes për tu ngritur në fluturim, morën rreth 10 orë e gjysmë, tha zyrtari. Trump, duke folur në klubin e tij të golfit Doral para ligjvënësve republikanë të hënën, u zotua se përdorimi i tij i paprecedentë i avionëve ushtarakë për deportime do të vazhdojë dhe çdo vend që refuzon pritjen e avionëve, do të "paguajë një çmim të lartë ekonomik".