Kandidatët republikanë presidencialë shkëmbyen sulme në debatin e tyre të parë për zgjedhjet presidenciale të vitit 2024, ndërsa tentuan të zinin pozicionin e kandidatit kryesor pas atij që mungonte, Donald Trumpit. Ish-presidenti amerikan u tall me debatin në një intervistë të regjistruar paraprakisht, por të publikuar në të njëjtën mbrëmje me debatin e mbrëmshëm. Debati i vrullshëm dy-orësh ofroi një panoramë të sfidave me të cilat përballen kandidatët në përpjekjen për ta larguar Trump nga pozicioni i tij si kandidati favorit për ta fituar kandidaturën për president të vendit nga Partia Republikane. Pasi që ish-presidenti vendosi të mos marrë pjesë në këtë debat, rivalët e tij e sulmuan njëri-tjetrin në përpjekje për t'u shfaqur si alternativa më e besueshme, pesë muaj para garës së parë për ta fituar kandidaturën nga Partia Republikane dhe më shumë se 14 muaj para zgjedhjeve.