Mbledhja e thirrur nga kryeministri Edi Rama në zonën e fshatit Kuç është shoqëruar me debate të forta. Gjatë takimit, krerët e bashkive që parashikohet të shkrihen, si Selenica, Divjaka, Poliçani dhe Dimali, kanë shprehur hapur kundërshtimin e tyre ndaj ndryshimeve të propozuara. Debatet kanë vijuar me tone të forta, ndërsa situata është tensionuar veçanërisht gjatë përballjes mes kryeministrit Rama dhe kryetarëve të Bashkisë Dimal dhe Bashkisë Poliçan. Pas përplasjes, Rama ka kërkuar largimin e dy kryebashkiakëve nga mbledhja, ndërsa takimi ka vijuar me pjesëmarrjen e drejtuesve të tjerë vendorë. Përplasje dhe debate ka pasur edhe me kryetarët e Bashkisë Selenicë dhe Bashkisë Divjakë. Ata kanë kundërshtuar ndryshimet që prekin njësitë që drejtojnë, duke ngritur shqetësime për pasojat që mund të sjellë riorganizimi territorial për bashkitë dhe komunitetet që përfaqësojnë. Pavarësisht largimit të dy kryebashkiakëve, mbledhja ka vijuar, ndërsa diskutimet kanë nxjerrë në pah kundërshtitë e forta që shoqërojnë reformën e re territoriale.