Partia e ekstremit tw djathw në Bundestag, Alternativa për Gjermaninë, AfD, ka kërkuar me anë të një mocioni në parlamentin gjerman anulimin e Rregullores së Ballkanit Perëndimor. Argumenti kryesor është kriza ekonomike dhe papunësia e shkaktuar nga pandemia.Deputeti i kësaj partie, Rene Springer, tha se fuqia punëtore nga Ballkani Perëndimor ul pagat e vendasve. Sipas tij punëtorët që vijnë me këtë rregullore marrin deri në 900 euro në muaj më pak se kolegët e tyre gjermanë."Kjo rregullore është ulje page me mbështetje nga shteti dhe ju bëni sikur nuk shikoni", tha Springer. Por deputeti shtoi tha se rregullorja nuk është e dëmshme vetëm për Gjermaninë, por edhe për vendet e Ballkanit, prej të cilëve po largohet fuqia punëtore. Ai përmendi ndër të tjera Kosovën, ku "largimi i personelit shëndetësor e ka çuar sistemin shëndetësor në një gjendje alarmante". Degët kryesore të punësimit sipas rregullores së Ballkanit Perëndimor janë ndërtimi dhe gastronomia. Kërkesa e deputetëve të AFD u hodh poshtë nga kolegët e partive të tjera. Ata të gjithë vunë në dukje se Rregullorja e Ballkanit Perëndimor nuk përbënte aspak konkurrencë për gjermanët, pasi një nga kushtet për t'u pajisur me vizë pune sipas kësaj rregulloreje është leja e punës. Këtë kandidati e merr vetëm nëse për profesionin e tij nuk ka konkurrentë vendas. "Këtu asnjë ballkanas nuk i merr vendin e punës ndonjë gjermani", tha Daniela Kolbe nga parita socialdemokrate. Deputeti i partisë liberale, Johannes Olpe, u shpreh se qëllimi i këtij mocioni nuk është kontrolli. Rregullorja e Ballkanit Perëndimor u miratua në vitin 2016 dhe u lejon emigrantëve nga Ballkani të shkojnw në Gjermani edhe nëse kanë kualifikime të ulëta.